Wakala wa Usajili wa Biashara na Leseni

DKT JAFO AWATAKA WABUNIFU KUSAJILI BUNIFU ZAO BRELA

Waziri wa Viwanda na Biashara, Mhe. Dkt. Selemani Jafo amewataka wabunifu wote nchini

kulinda bunifu zao kwa kuzisajili kisheria ili zisichukuliwe na watu wengine na kujinufaisha nazo bila kufuata utaratibu wa kisheria.

Wito huo umetolewa leo katika ziara aliyoifanya ofisi za Wakala wa Usajili wa Biashara na

Leseni (BRELA) jijini Dar es Salaam ili kujionea utendaji kazi na kujifunza namna Wakala

inavyotoa huduma za Sajili mbalimbali.

Akizungumza katika kikao hicho Dkt. Jafo amebainisha kuwa kuna bunifu nyingi ambazo

zinachukuliwa na na watu wengine wanaziendeleza na kujiongezea kipato lakini wale wabunifu hawanufaiki na chochote kwa kuwa hawakuzisajili.

“Ninatoa wito kwa watanzania wabunifu wote kusajili bunifu zenu kupitia BRELA maana taasisi

hii inakazi ya kulinda haki za ubunifu ili kuwawezesha kufaidika na jitihada za ubunifu na hatimaye kuongeza kipato kwa wabunifu na taifa kwa ujumla” amesisitiza Dkt. Jafo

Ameeleza kuwa, Tanzania imesaini mikataba na nchi mbalimbali katika nchi za Jumuiya ya

Afrika Mashariki, Jumuiya ya Maendeleo Kusini mwa Afrika (SADC) pamoja na Soko Huru la

Biashara Afrika (AfCFTA) katika maeneo hayo yote Watanzania wanashiriki katika biashara

mbalimbali hivyo kuna haja kubwa ya wabunifu kutambua haki zao ili zisichukuliwe na wenzetu

hivyo niwaombe Watanzania kusajili bunifu zao.

Amewaelekeza watumishi wa BRELA kuwa wawezeshaji wa Wafanyabiashara kwa kuwasaidia katika kufanikisha kurasimisha biashara zao na siyo kuwa kikwazo. Aidha, amewataka kutumia kanuni na sheria kusaidia biashara kwenda mbele na sheria ambazo zinakwamisha ziwasilishwe ili ziweze kufanyiwa maboresho. Ni muhimu kuelewa jukumu la BRELA ni kujenga misingi na mazingira mazuri ya biashara.

Naye Mwenyekiti wa Bodi ya Ushauri ya Wizara kwa BRELA, Prof. Neema Mori, amesema

kuwa BRELA imedhamiria kuhakikisha mazingira ya ufanyaji biashara nchini yanakuwa bora

zaidi kwa kuwawezesha, kuwarahisishia na kutoa usaidizi wa karibu kwa wafanyabiashara

wanapo rasimisha biashara, kutoa elimu pamoja na kuwahusisha wadau mbalimbali ili wajue

namna.

Kwa upande wake Afisa Mtendaji Mkuu wa BRELA, Bw. Godfrey Nyaisa amesema kuwa kwa

sasa sera ya miliki ubunifu inaelekea kupitishwa na baadae kuwa na sheria ambayo itasaidia

ongezeko kubwa la maombi ya ulinzi wa bunifu hizo ambapo kuna jitihada ambazo BRELA

inaendelea nazo katika kuhakikisha elimu ya miliki bunifu inafahamika kuanzia ngazi ya shule

ya za msingi hadi vyuo vikuu.

Mbali na jukumu la kusajili miliki ubunifu na utoaji wa hataza amesema kuwa BRELA inatoa

ufadhili wa Shahada ya Uzamili ya Miliki Ubunifu katika Chuo Kikuu cha Dar es Salaam kwa

watu watano kila mwaka ambapo elimu hii mtu atakayoipata itasaidia katika ukuaji wa sekta ya

miliki ubunifu nchini.